Árið 2023 var heldur betur Vettvangur fyrir alls kyns tíðindi, og gaf undanförnum sprækum árum ekkert eftir. Hér stiklum við á stóru í því helsta sem á daga okkar dreif á árinu sem er að líða.

Árið byrjaði með stórtíðindum af Vettvangi, því nýtt systurfyrirtæki Vettvangs í applausnum , Apparatus, var hleypt af stokkunum.  Síðustu ár höfum við öðlast mikla reynslu í hönnun og smíði applausna en til að gefa appþróun okkar meiri vigt og fókus var stofnað sérstakt félag og vörumerki um reksturinn. 

Og Apparatus tók á loft af krafti með frábærum lausnum fyrir Lyfju, Atlantsolíu og Domino's. Mörg fleiri verkefni eru í pípunum, sem ekki má segja frá. Í bili.

Árið byrjaði hressilega með sprækum og líflegum vef fyrir Core heildverslun, sem dreifir vinsælum neytendavörum eins og Nocco drykkina og Barabells próteinstykkin. Stærsta breyting fyrir Core var gríðaröflug vefverslun sem er sniðin að þörfum B2B fyrirtækja.

Nýr vefur Vistor er nýjasta rósin í hnappagat Veritas samstæðunnar, sem er á mikilli stafrænni vegferð sem snýr að innviðum og ferlum jafnt sem öllum snertiflötum við viðskiptavini.

Flugmálahandbók Íslands er nú aðgengileg í snjallsímum og spjaldtölvum í gegnum vefapp (e. progressive web app). PWA lausnir hafa góða virkni í lélegu netsambandi, sem er mikilvægt fyrir notkun lausnarinnar.

Lyfja gaf út nýja útgáfu af appi sínu í samstarfi við Apparatus og Vettvang. Nýja appið býður betri notendaupplifun með dýpri vörulýsingum, betri vöruflokkun og mun meira vöruúrvali.

Nýr vefur Ungmennafélags Íslands kom út í sumar. Vefur UMFÍ var endurhannaður frá grunni með nýju viðmóti, efni og skipulagi. Lausnin var færð í nútímalegt tækniumhverfi sem gerir félagið klárt fyrir hvers kyns framtíðarþróun.

Netgíró fékk líka glæsilega uppfærslu á árinu. Endurhannaður er vefur er léttleikandi, flæðir einstaklega vel og sýnir skemmtilega á myndrænan hátt hvernig þjónusta Netgíró gengur fyrir sig.

Atlantsorka er nýtt fyrirtæki á raforkusölumarkaði sem selur rafmagn til heimila og fyrirtækja um land allt. Nýr vefur fyrir Atlantsorku er lykiltæki í markaðssókninni framundan en við getum staðfest að það var húrrandi jákvæð orka í þessu verkefni.

Eitt stærsta verkefni ársins á Vettvangi var nýr vefur fyrir Lífeyrissjóðs verslunarmanna. Vefurinn er einstaklega efnismikill í takt við umsvifamikla starfsemi en á vefnum er einnig að finna nákvæmar lífeyris- og lánareiknivélar.

Vinnslustöðin er burðarstólpi í samfélagi Eyjamanna. Nýr vefur VSV framtíðartryggir stafræna þróun með uppfærðri tækni, en allt viðmót var endurskipulagt og efni uppfært.

Í byrjun desember kom út nýr vefur HS Orku, sem við erum asskoti montin af. Meðal annars var hannað nýtt útlit á stafrænni framsetningu vörumerkis HS Orku þar sem kvik hönnunarelement gefa vefnum létt og frísklegt yfirbragð.

Fyrsta útgáfa af nýjum veflausnum Fastus komu svo út undir lok árs, en þær endurspegla nýja stefnumörkun og miklar skipulagsbreytingar að undanförnu. Á næsta ári líta dagsins ljós öflugar vefverslanir sem munu keyra áfram stafræna sókn fyrirtækisins.

Hönnunarsprettir í anda „Google Design Sprints“ keyrðir í kröftugum vinnustofum hafa vaxið í vinsældum hjá okkur og eru nánast regla á fyrstu stigum nýrra verkefna.

Á árinu héldum við m.a. eftirminnilegar vinnustofur fyrir Domino's, Lífeyrissjóð verzlunarmanna, Fastus, og Lyfju.

Stafrænir leiðtogar þróast stöðugt áfram
Það er blásið í lúðra þegar nýjum vefjum er hleypt í loftið, en þróunin heldur látlaust áfram hjá flestum okkar viðskiptavina, enda eru tæknibreytingar hraðar og kröfur notenda aukast stöðugt í hörðu samkeppnisumhverfi.

Sem dæmi um stafræna leiðtoga sem stunda stöðuga þróun á sínum lausnum má nefna Domino's, Hugverkastofuna, Eimskip, Heilsuveru og Lyfju.

Vettvangur hélt upp á 10 ára afmæli sitt í september með pompi og prakt. Margir góðir gestir kíktu á Suðurlandsbrautina og skáluðu með okkur til að fagna áfanganum.

Vettvangur hefur stækkað og blómstrað síðastliðinn áratug, viðskiptavinum fjölgar stöðugt og útgefin verkefni skipta mörgum tugum. Leiðin sem við fórum? Lestu allt um hana hér.

En saga okkar er rétt að byrja - skál! 🥂🎉🥳

Í maí var Vettvangur útnefnt Fyrirmyndarfyrirtæki VR 2023 - fimmta árið í röð. Elmar okkar tók við viðurkenningu VR fyrir hönd Vettvangs og fannst það ekki leiðinlegt.

Þetta er sérstaklega ánægjuleg viðurkenning þar sem hún mælir hvernig okkar starfsfólki líður í starfi sínu á Vettvangi.

Reksturinn hefur líka gengið vel og fengum við viðurkenningu þess efnis annars vegar frá Keldunni/Viðskiptablaðinu, hins vegar frá Creditinfo. Aðeins um 2% fyrirtækja komast í gegnum nálarauga þessarra matsaðila.

Elmar veitti skemmtilegt viðtal í fjármálahlaðvarpinu Pyngjunni þar sem hann fór yfir reksturinn og sögu Vettvangs í tilefni af 10 ára afmælinu.

Vettvangsteymið bryddar upp á ýmsu til að hrista hópinn saman, rífa sig frá skjánum og rifja upp andlitsdrætti hvers annars. Vettvangur fór meðal annars í skemmtilega ferð til Kraká í Póllandi í sumar þar sem teymið reyndi fyrir sér í go-kart maraþonkeppni og í Escape Room Krakow. 

Sendinefnd frá Vettvangi heimsótti líka árlega ráðstefnu Umbraco í Óðinsvéum - Codegarden - þar sem fræðst var um helstu nýjungar í kerfinu og það sem best gerist í heiminum í Umbraco lausnum.

Skákklúbbur Vettvangs hóf starfsemi sína á árinu og vaskir Vettvangsmenn fóru saman í strandblak. Árlegur og ómissandi ljótujólapeysudagurinn var á sínum stað þar sem keppt var í æsispennandi pub-quiz spurningaleik og piparköku- og konfektáti.

Fleiri og flóknari verkefni kalla á fleiri hendur og hausa. Við vorum heppin á árinu á krækja í forritarana Hafliða, Jakob, Ingimar, Ólaf og Söru Ósk, sem eru öll annað hvort bráðefnileg eða þrautreynd í faginu.

Hönnunarteymið fékk líka liðstyrk í Loga Sæmundssyni, sem lauk nýlega námi í Academy of Art University í San Fransisco.

Aðrir góðir félagar fundu annan vettvang fyrir sína þroskabraut, og óskum við þeim alls hins besta með þökkum fyrir samstarfið.

Nú árið er liðið í aldanna skaut og kemur víst aldrei til baka, en það er líka í góðu lagi. Baksýnisspegillinn er ágætur á tímamótum, en annars viljum við á Vettvangi horfa fram veginn. Við hlökkum til að taka á móti nýja árinu - með nýjum verkefnum, nýjum samstarfsaðilum og mjög líklega fleiri nýjum samstarfsmönnum!

Hans Júlíus Þórðarson